Jou sa a, vè 2 zè nan maten yon madanm ki gen yon tranche cho monte lopital pou l akouche. Lè l rive, yo bay li kabann, enpi mis la mande l :
-Madanm, ki doktè prive ki t ap suiv ou?
-Adje mis, yon malerèz kon wen, kote m te ka gen doktè prive.
Madanm kouche, yo pa mande l ki machandiz li pote. Bò inè nan apre midi, fanm lan rele mis la pou l di li santi pouse.
-Wou madanm ou pa santi pouse, mis la reponn.
Paske mis la te okipe ap bay ti blag li sou galri a. Bò inè edmi konsa, tèt pitit kòmanse soti, yo kilbite fanm ansent la pou yo mete l sou ti bourik, devan ap chire, chèche bwat zouti pou bay fanm kout bistouri, yo pa fouti jwenn bwat zouti. Konsa fanm lan chire, devan kontre ak dèyè. Bèl akouchman paske manman ak pitla vivan, men traka pou lakay…
2 zè apremidi, lè mis rive pou li ale paske lè sèvis li bout, li kite madanm lan sou ti bourik la, devan kontre ak dèyè …
Demi èdtan pase yon lòt mis parèt, enpi li di:
-Kote fanmiy fanm sa a?
-Me mwen wi mis, mari fanm lan reponn. Gason ap tranble, èske se move nouvèl.
-Èske w gen kòb mesye?
-Wi mwen gen yon ti monnen wi mis. La menm negosyasyon fèt, bwat zouti parèt rapid, fanm lan koud, devan pa kontre ak dèyè ankò…
Deyontoloji ak Etik Medikal vle di: tout prensip ak règ yon travayè sante dwe suiv pou li fè byen enpi evite mal nan pratik medikal la.
Si se erè medikal travayè sante a komèt, li gen padon, men si se neglijans medikal, deyontoloji medikal la dwe kondane l, dekwa pou wou menm, mwen menm ak fanmiy nou jwenn meyè swen ak sèvis sante.
