Pa bòresit, lopital leta konsidere tankou yon randevou ak lanmò. Menm si w pa malad, denpi w rive nan gran lopital, ou ka mouri ak endiyasyon.
Se konsa dimanch ki te 4 janvye bò 8 tè edmi nan maten, 3 moun fè aksidan machin; yonn gen pye kase, yon lòt mouri ak yon tifi ki gen laj 8 lane, ki blese grav.
Tifi a rive gran lopital bò 9 vè nan maten. Lè sa a pa gen okenn travayè sante ki ka pran desizyon. Telefòne travayè sante, yo reponn pou di: l ap dòmi. Pandan tan sa ti pitla ap anfle.
Apre yon bon bout tan, yon travayè sante parèt; lè yo eksplike l ka a, li reponn fanmiy ti malad la: m pa vin sou bagay konsa jodya, m gen dwa pa travay jodya, paske se demokrasi.
Lè travayè sante a derape machin li pou li ale, fanmiy ti malad la mande l si l ap retounen; li reponn leta pa bay machin, enpi jodya se dimanch.
Nan demach pou jwenn lòt travayè sante chofè lanbilans deklare, moun ki pou bay otorizasyon sòti ak lanbilans, ponkò vini enpi lanbilans lan pa gen gaz.
Bò 4 trè edmi nan apremidi, ti pitit tifi ki gen laj 8 lane a mouri angòje ak san…
M ap mande, lè leta ap peye travayè sante, èske leta retire lajan pou samdi, dimanch, ak jou konje…
M ap di moun yo ki rèsponsab, Atansyon, paske jodya se pou lòt la, demen, se pou yo ou byen pou yon fanmiy yo…
