-Alo mis Kalanbè

– Wi, Alekout, se ki moun ki pèmèt li rele m nan lè sa a 8 tè nan aswè, m deja monte kabann pou mwen dòmi?

-Non, se mwen mis Toulimen.  Kòm mwen konnen w pa gen anyen pou w fè, ni mwen tou, alò  m rele w pou n bay 2 blag

-Aaaa mis Toulimen, kòman w ye, ou pa resevwa ka ijan  menm semenn sila nan lopital ou a?

-Kisa ka ijan vledi menm mis Kalanbè?

-Ka ijan, se moun ki malad grav, ki ka mouri si yo pa bay li swen rapid.

-An, konsa, denpi bò 9 vè nan maten jodya, yo te vin lage yon mesye k ap tchimen, l ap vomi san la. Men, m wè  salopri a prèske mouri la. Ou konnen m byen lwen andeyò, m rele okap pou yo vin chèche l yo reponn mwen machin lanbilans lan pa gen gaz ak luil, chofè yo malad, travayè sante ki pou fè operasyon ale nan vakans ozetazini enpi lakwawouj pa gen san, nan sal operasyon pa gen gaz, pa gen akòl, pa gen pens…

-Enben pitit, ki sa w fè?

-Enben, mwen di fanmiy mouche a pou yo kòmanse chèche menizye pou yo fè sèkèy mesye a, paske m pa dakò pou moun pye blanch sa yo vin pete gwo rèl kriye la pou anpeche m dòmi…

-Bon mis Toulimen, m te kwè yo di telefòn yo la pou anpeche malere ak malerèz  mouri tankou chyen san mèt ankò? Ki itilite telefòn sayo menm konnyè a?

-Machè mis Kalanbè, nou dwe bat bravo pou rèsponsab  yo paske yo mete telefòn pou nou. Telefòn yo itil paske yo pèmèt nou bay ti blag nou nenpòt lè…